BR LA UNION – Mamati iti Department of Health nga adda epekto iti climate change iti nasapa a panagngato ti kaso ti dengue ita a tawen.
Segun kenni DOH spokesperson ken Asec. Albert Domingo, nasapsapa a nagrugi ti panagtudo ditoy pagilian gapu kadagiti weather patterns kas ti shearline, ITCZ, ken easterlies a gagangay a mapasaran laeng tunggal Hunyo ken Hulyo.
Naamwan a sumagmamano a lugar idiay Metro Manila iti nagdeklara ti dengue outbreak iti naglabas a lawas, ngem in-inut a bumab-baban iti bilang dagiti mailislista a baro a kaso ita a lawas.
Impadamag pay ti DOH a mas mababa iti mortality rate ti sakit ita a tawen 2025, nga aganay 0.36% laeng kumpara iti 0.43% iti kapada a panawen ti 2024.
Kayatna a sawen, tunggal 1,000 pasyente, tallo agingga uppat laeng iti mat-matay.
Iti likudan daytoy, naminsan pay a nagpalagip ti ahensya a saan a rumbeng nga agpakampante ti publiko, agsipudta mabalin a ngumato manen ti kaso ti dengue nu saan nga itultuloy ti agdalus ken dadduma pay a panagannad.
Nabalakadan pay ti publiko a dagus nga agpakita iti doktor nu adda sintomas ti dengue tapno maliklikan a kumaru ti kondisyon.
