Agpada a natay iti maysa a retirado a pulis ken agdama a Barangay Chairman ken ti maipagarop a nangpaltog kenkuana a kandidato para-konsehal ti ili idiay Barangay Nagtupacan, Lagangilang, Abra.
Nabigbig dagiti biktima isuda: Lou Salvador Claro, 57-anyos, agdama a barangay kapitan ken retirado a police personnel idinto a ti suspek ket ni Manzano Bersalona Agdalpen, 58-anyos, kandidato para Sangguniang Bayan ken agpada a residente iti nasao a lugar.
Napasamak ti pammaltog agarop 6:50 ti rabii idi Lunes, April 7, 2025.
Agpar-parang iti imbestigasyon ti Lagangilang Police, a bayat iti panagkampanya ti “Team ASENSO” a pakaibilangan ti suspek ket maipagarop a kellaat nga inasetgan ken dinanog na ti maysa a residente, managan Romeo Apolinar.
Gaputi dayta, nagpulong ni Apolinar kenni Barangay Captain Claro, banag a dagus met a nagresponde ken nagturong iti pagkam-kampanyaan da Agdalpen.
Iti panagturong ni Kapitan Claro iti pagkam-kampanyaan da Aldapen, maipagarop a kimmaru ti sitwasyon idi agsinnungbat dagitoy ken naminsan pay a dinanog ti kandidato ni Apolinar.
Induron pay ni Agdalpen ni Claro kasaruno iti panangpaltog na iti namin-anu a daras bayat a ti suspek ket pinaltogan ti saan pay a nabigbig a suspek.
Naiturong ti kapitan idiay Seares Hospital ngem naideklara a dead on arrival idinto a ti suspek ket naiturong idiay Abra Provincial Hospital ngem naideklara met laeng a dead on arrival.
Iti pannaki-uman ti Bombo Radyo Vigan kenni PCOL. Froiland Lopez, Provincial Director iti Abra Police Provincial Office, kinuna na a ti kandidato iti maipagarop a nangpaltog iti barangay kapitan idinto a saan pay a nabigbig ti nangpaltog iti kandidato.
