BR LA UNION – Agtultuloy iti panagbaba ti bilang dagiti baro a makap-kaptan ti sakit a dengue ditoy Pilipinas.
Base iti datos ti Department of Health (DOH), aganay 9,289 ti nailista a baro a kaso ti dengue manipud Marso 16 agingga 29, 2025, mas nababbaba daytoy ti 23% kumpara iti 12,050 a nailista manipud Marso 2 agingga 15, 2025.
Inpadamag ti ahensiya nga aganay 0.36% iti Case Fatality Rate (CFR) wenno dandani uppat iti tunggal sanga-ribu a nakaptan ti sakit iti mat-matay.
Pattien ti DOH a ti panagbaba dagiti baro a kaso ket gapwanan ti napa-pigsa a vector control iti komunidad, agraman iti simple a “Taob, Taktak, Tuyo, Takip” — panangikkat, pananglinis, panang-pamaga, ken panangkalub dagiti container a mabalin a pagumukan ti lamok.
Iti nababa a case fatality rate ket gapwanan ti nasapa a panagpa-konsulta dagiti pasyente base iti health education program ti ahensya seknan dagiti sintomas a rumbeng a bantayan, napartak a panangipaay ti medikal nga atensyon kadagiti pasyente a dumat-datag iti “Dengue Fast Lanes” ti DOH hospitals tapno maliklikan iti nakar-karu pay a komplikasyon ti dengue.
Iti pakabuklan, aganay 95,262 iti nai-rekord a kaso ti dengue ditoy pagilian manipud Enero agingga Abril 2025. Nangat-ngato daytoy ti 75% kumpara iti 54,556 a nailista idi 2024.
Abiso ti DOH, ituloy iti “Alas Kwatro Kontra Mosquito”—mangilatang ti oras tunggal alas-kwatro ti malem iti inaldaw tapno sapolen ken dadaelen dagiti posible a pagum-umukan dagiti lamok iti pagtaengan, pagadalan, ken lugar ti trabaho.
Agusar kadagiti bukod a proteksyon kas iti long sleeves, long pants,ken insect repellent.
Mangikabil ti insecticide treated screens/kurtina iti bintana. Mabalin pay nga agusar ti muskitero nu maturog, ken dagus a kumonsulta iti healthcare worker.
