BR LA UNION – Inallokoy ti Public Relations Society of the Philippines (PRSP) dagiti miyembro na a suruten dagiti etikal nga annuruten ti propesyon da ken kinondenar iti panagusar ti peke nga accounts tapno agiwaras ti biddut nga impormasyon seknan iti sanikua ti Pilipinas a West Philippine Sea.
Daytoy ket kalpasan nga inwaragawag ni Senate Majority Leader Francis Tolentino a ti Chinese Embassy ditoy Pilipinas ket nag-hire ti maysa a lokal a kumpanya tapno ag-recruit iti “keyboard warriors” nga agiwaras ti disinformation iti social media.
Segun iti PRSP, iti pagrebbengan da ket papigsaen iti reputasyon dagiti kliyente ngem saan a rumbeng nga aramiden daytoy a maka-perwisyu iti publiko.
Impakita ni Tolentino iti maysa a Senate hearing ti maysa a kontrata a nakailanad ti koneksiyon ti Chinese Embassy ken Makati-based marketing firm nga Infinitus Marketing Solutions Inc., nga adda pakainaigan iti 330 a peke a Facebook ken X (sigud a Twitter) accounts a nagiwaras ti maipagarop a biddut nga impormasyon.
Gaputi dayta, immandar ti Malacañang ti imbestigasyon ken nagpanawagan kadagiti mammanday linteg a kitaen a naimbag iti posible a kaso a maidatag kontra kadagiti mairam-raman.
