BR LA UNION – Pagsung-sungbaten ti Korte Suprema iti maysa a pagadalan gaputi insidente ti bullying gaputi panagbaybay-a a nagbanag iti pannaka-dangran ti maysa nga estudyante idi tawen 2007.
Iti naisapubliko a waragawag ti kangatuan a pagukuman, nadisukubre a saan a nasungbatan ti Mother Goose School iti inaramid a panang-danog iti maysa nga estudyante a Grade 3.
Maibasar daytoy ti nakailanad iti desisyon nga insurat ni Associate Justice Mario V. Lopez iti Second Division ti Korte Suprema.
Rimuar iti imbestigasyon, a namin-adu a daras a nadanog ti biktima iti maysa a computer class babaen ti dua nga estudyante a kaklase da bayat nga adda iti comfort room ti teacher.
Makunkuna nga awan ti nagbalin a panniguro ken maitutop nga aksyon a naaramid iti laksid ti panagipulong ti biktima iti teacher na.
Uray iti pagadalan ket napaneknekan a saan da nga inasikaso iti reklamo ti nagannak ti biktima nga estudyante a nangkiddaw a maimbestigaran iti insidente, nga iti udi, napag-desisyunan ken inawagan ti pagadalan a maysa laeng a “panang-suron” wenno “rough play” isunga awan ti inaramid da a disciplinary action.
Gaputi dayta, nangidatag ken nagsumite ti reklamo iti nagannak ti biktima kontra iti pagadalan, mangisursuro ken uray iti ama ti dadduma nga estudyante.
Gaputi dayta, iti Regional Trial Court (RTC) ket nangiruar ti desisyon a mangibagbaga nga adda sung-sungbatan ti pagadalan ken iti maseknan a titser agsipudta pagrebbengan da a siguradwen ti kinatalged ti tunggal agad-adal.
Napasingkedan ti nasao a desisyon ti Regional Trial Court, babaen iti Court of Appeals ken Korte Suprema.
Imbilin ti Korte Suprema iti nasao a pagadalan nga agbayad ti danyos iti nagannak ti biktima iti kantidad a P650,000.
