Naalarma ni Senate Committee on Public Services Chairman Senador Raffy Tulfo kadagiti nagsasaruno nga aksidente ti kalsada a nagtungpal ti pannakatay dagiti sumagmamano nga biktima.
Idi Mayo 1, sangapulo ti natay bayat a 37 met dagiti nadundunor gapo ti karambola idiay Subic-Clark-Tarlac Expressway (SCTEX) Toll Plaza a nagtaud gapo iti nakaturog a driver ti Pangasinan Solid North Transit Incorporated.
Sumagmamano nga aldaw laeng ket dua met a tattao ti natay kasaruno ti panangararo ti SUV iti departure area ti Ninoy Aquino International Airport (NAIA) Terminal 1 idiay Pasay City.
Segun ti inisyal nga imbestigasyon, nataranta ti driver ken imbes a preno ket aksidente na a napaddekan ti silinyador.
Kinuna met ni Tulfo a nupay kadawyan nga ibagbaga ti kaadwan a ti aksidente ket saan nga inggagara, mabalin met daitoy a makissayan wenno maliklikan.
Dapat kunana a maimbestigaran ti kaso ti bus driver a nakaturog kabayatan ti panagmanehar na ti sadiay SCTEX nu daitoy ket overworked wenno lagpas ti innem nga orasen a naka-duty.
Segun iti senador, nasken nga agbalin a strikto ti Land Transportation Office (LTO) kadagiti screenings dagiti drivers a maikkan ti lisensya ken masiguro nga isuda ket addaan ti umdas a driving skills kasta met a mentally fit tapno agbiahe.
