BR LA UNION– Natay iti dua a pulis idiay ili ti Naujan, Oriental Mindoro kalpasan a tinamaan dagitoy ti kimat bayat nga adda da iti uneg ti kampo.
Inabot ti nasurok maysa nga oras sakbay a nadiskubre dagiti kakadwa da iti pasamak idiay Regional Mobile Forces Battalion idiay Barangay Pinagsabangan.
Maibasar iti inisyal nga imbestigasyon ti Police Regional Office 4-B, mabalin a nagparada dagitoy ti motor idi tinamaan da ti kimat pasado alas 10:30 ti rabii.
Naiturong pay dagiti biktima iti kaasetgan nga ospital ngem naideklara a dead on arrival.
Mainaig ti daytoy, nangidanon ti pannaki-simpatiya ni Police Regional Office 4B director Brig. Gen. Roger L. Quesada iti pamilya dagiti biktima ket nagkari a maipaayan da ti maiparbeng a tulong.
Maipalagip nga idi tawen 2009, dua manen a miyembro ti Special Action Force iti natay ken innem dagiti nasugatan kalpasan a natamaan da ti kimat bayat ti panangi-simpa da ti radio antenna idiay probinsiya ti Abra.
