BR LA UNION – Saan a bumaba iti 28 a tattao ti naipadamag a natay iti panagduprak ti napigsa a bagyo ken buhawi manipud iti tengnga a paset ti East Coast, segun kadagiti opisyal.
Kangrunaan a tinamaan idiay Kentucky, kalpasan a 19 ti naipadamag a natay, kaadwan manipud Laurel County.
Segun kenni Gov. Andy Beshear, kabilang kadagiti natay iti maysa a beterano a bombero a ni Maj. Roger Leslie Leatherman, bayat ti panag-responde na.
Adu a babbalay ti nadadael ken napilitan dagiti pamilya nga aglemmeng iti basement ti babbalay da bayat ti panagduprak iti napigsa a tornado.
Kabayatanna, idiay Missouri, pito ti naipadamag a natay, lima idiay siyudad ti St. Louis, a tinamaan ti maysa nga EF-3 tornado wenno alipogpog a napakuyogan ti napigsa nga angin nga umabot ti 140 mph wenno nasurok 225 km/h.
Idiay met state of Virginia, dua a tattao ti natay kalpasan a natupakan ti kayo iti lugan da.
Iti pakabuklan, 15 nga estado iti naapektaran ti bagyo, ken 26 ti naipadamag a dimmuprak nga alipogpog ken dadackel nga hail.
Nasurok 462,000 a babbalay iti naipadamag a napukaan iti suplay ti kuryente.
Kabayatanna, nagballaag dagiti weather authorities, iti baro a panagduprak ti dakes a panawen, partikular idiay state of Oklahoma, Texas, Northeast U.S., ken South-Central Plains.
Pagdandanagan a mangigubway daytoy iti napipigsa a tudo, angin, hail, ken tornado.
