BR LA UNION – Inarestar ti Criminal Investigation and Detection Group (CIDG) iti mayor ti South Upi, Maguindanao del Sur agraman ti asawa na gapu iti pakainaigan dagitoy iti pammapatay iti bise mayor na idi Agosto napalabas a tawen.
Naisayangkat ti pannaka-aresto kenni Mayor Reynalbert Insular idiay Barangay Making, Parang, Maguindanao del Norte.
Daytoy ket babaen iti inserbi dagiti otoridad nga warrant of arrest gapu iti kaso a murder, frustrated murder ken attempted murder nga inpaulog ti Regional Trial Court Branch 27 idiay Cotabato City idi Lunes, Mayo 19.
Maipalagip nga idi Nobyembre napalabas a tawen, nangidatag ti kaso iti nabukel nga special investigation task group kontra iti 12 nga akusado a pakairamanan ti mayor ken asawa na gaputi pannaki-kutsabo ken panag-plano ti panagtambang.
Nagramot ti kaso idi natambangan idi Agosto 2, 2024 idiay Sitio Linao, Barangay Pandan, South Upi, Maguindanao del Sur ni Vice Mayor Roldan Benito ken iti security aide na a ni Weng Marcos nga agpada a natay, idinto a nasugatan iti insidente ti asawa ti Bise Mayor a ni Brgy. Chairperson Analyn Benito ken anak-da nga 11-anyos, nga agpada a tinamaan ti bala.
