BR LA UNION – Nagtataray dagiti turista kalpasan a kellaat a nangipugso ti napuskol nga asok ken dapo iti Mount Etna idiay Sicily, Italy.
Ti nasao nga eksena ket dagus a nagbalin a viral online iti social media.
Makita iti video nga imbinglay ni @aurelienpouzin iti social media platform, iti panagtataray dagiti gasut a turista iti igid ti bulkan bayat a nabalkot ti tangatang iti timpuar a napuskol nga asok manipud iti bulkan.
Bayat a dagiti dadduma ket nagtalinaed a nakatakder tapno imatangan ti naidumduma a pasamak agingga a nagsasaruno met laeng a timmaray a pababa ti bantay.
Mangngegan pay iti video iti uni ti panagbettak ti bulkan ken ribu a tonelada a bato ken dapo iti impugso ti bulkan.
Naamwan a ti Mount Etna ket maysa nga aktibo a bulkan iti dumaya a paset ti Sicily ken tinawen a day-daywen iti aganay 1.5 milyon a turista.
Iti laksid ti peligro, adu latta ti bumis-bisita tapno laeng makita iti kinapintas ti bantay.
Segun kadagiti eksperto, iti napasamak ket maysa nga Strombolian eruption —maysa a klase ti panagbettak nga apagbiit ngem napigsa ken mangirwar iti arigna “fire fountain” wenno dackel nga apoy, dapo, ken dadackel a tipping ti bato.
Kabayatanna, segun iti local media immabot ti ashfall agingga idiay Piano Vetore ken adda pay nailista a babassit a panagayos ti lava agturong idiay Valle del Bove.
Segun iti National Institute of Geophysics and Volcanology (INGV) idiay Italy, namnamaen nga agwaras pay ti ashfall nga agturong iti laud amianan-a-laud ti nasao a pagilian.
