BR LA UNION – Inwaragawag ni National Unity Party (NUP) President ken CamSur Rep. LRay Villafuerte a naikkat kas miyembro ti partido ni Deputy Speaker ken Cebu Rep. ken House Deputy Speaker Vincent Franco “Duke” Frasco.
Gapu daytoy iti panangibabawi ni Frasco ti suporta na kenni House Speaker Ferdinand Martin Romualdez tapno agtalinaed ti panangidaulo na iti Kamara de Representantes iti 20th Congress.
Iti National Unity Party ket maysa kadagiti partido a kabilang iti supermajority coalition a sumupsuporta kenni Romualdez.
Segun kenni Villafuerte, nabayagen a polisiya ti National Unity Party a maymaysa iti boses ken addang da.
Naamwan a pormal nga indeklara ti National Unity Party iti sibubukel a suporta da kenni Romualdez, dandani maysa a bulanen ti napalabas.
Daytoy ket tapno maitultuloy iti tarigagay ti Bagong Pilipinas, iti panangidaulo ni Presidente Ferdinand Marcos Jr. a mapasayaat ti biag ti amin a Pilipino.
Innayon ni Villafuerte a napateg a maitultuloy ti agdama a liderato nangruna ket nangrugin nga apiten dagiti Pilipino iti benipisyo kadagiti naaramidan ti Presidente iti umuna a tallo a tawen a panangidaulo na iti pagilian.
Ni Rep. Frasco ket asawa ni Department of Tourism (DOT) Secretary ken sigud a Liloan, Cebu Mayor Christina Frasco, a nalatak a kaalyado ni Vice President Sara Duterte.
Nupay kasta, maysa ni Rep. Frasco kadagiti mammanaday linteg a nagpirma iti impeachment complaint kontra iti bise presidente.
