BR LA UNION – Maysa iti tunggal 10 a baro a kaso ti mailislista a human immunodeficiency virus wenno HIV iti umuna a quarter ti tawen ket naala babaen ti transactional sex wenno pannaki-naig kasukat ti kantidad.
Maibasar iti inruar a datus ti HIV and AIDS Surveillance of the Philippines, agpar-parang nga umabot iti 5,101 HIV cases iti nailista manipud Enero agingga Marso agdama a tawen.
Manipud iti nasao a bilang, umabot iti 596 a kaso wenno kaibatugan ti 12 percent iti naala babaen ti transactional sex iti uneg ti napalabas a 12 a bulan.
Pakaibilangan ditoy dagiti agbay-bayad ken agpab-pabayad para iti pannaki-naig.
Sipud naipadamag iti transactional sex idi 2012, umaboten iti pakabuklan a 16,586 ti nailista a kaso.
Segun iti Department of Health, 54% wenno kaibatugan ti 8,962 manipud iti pakabuklan a kaso nga addaan ti history ti transactional sex ket na-diagnose sipud idi 2020 agingga 2025.
Immunan a nagpanawagan ti DOH idiay Malacanang nga ideklara ti Health Emergency tapno masungbatan iti agtultuloy a panagngato ti HIV Cases ditoy pagilian.
