BR LA UNION – Dumanon iti 27.6 milyon nga estudyante ti basic education iti namnamaen a sumrek iti panaglukat ti klase ita nga aldaw, Hunyo 16, iti intero a pagilian.
Idaulwan da Education Secretary Sonny Angara ken Presidente Ferdinand Marcos Jr., iti pormal a panaglukat ti klase idiay Epifanio Delos Santos Elementary School idiay Singalong, Manila.
Segun iti Department of Education, mabingay ti nasao a bilang dagiti agad-adal iti: 15.42 milyon nga estudyante iti elementarya, 8.01 milyon iti junior high school (Grade 7 agingga Grade 10) ken 4.17 milyon iti senior high school (Grade 11 ken Grade 12).
Nakatuding pay a bumisita ni Angara idiay Tenement Elementary School idiay Taguig, ken iti dua pay a pampubliko a pagadalan idiay Laguna, tapno personal nga kitaen nu kasatnu kasagana dagiti pagadalan ken dagiti arwaten iti aktuwal nga operasyon.
Maibasar iti datos ti DepEd, adda iti 875,514 a mangisur-suro iti naduma-duma a public schools iti intero a pagilian.
Nupay kasta, gapu iti agtultuloy a panagngato ti bilang dagiti agad-adal, mapatta-patta nga agkasapolan pay ti ahensiya ti kanayunan a 56,050 teachers itaa tawen 2025.
Kas iti napal-palabas a panaglukat ti klase, agtaltalinaed a kangrunaan a parikot iti panagkur-kurang iti pasilidad, partikular iti silid-aralan, nangruna iti natao a lugar.
Adda met iti aganay 45,199 a pampubliko a pagadalan iti intero a pagilian, a kaadwan kadagitoy ket agus-usar iti nakipet wenno pang-adu a shift nga iskedyul gapu iti kinakurang ti espasyo.
Ipak-pakita pay ti baro a datos manipud DepEd a limbes iti 165,000 iti panagkur-kurang ita iti classroom.
Segun kenni Angara, iti nasao a panagkur-kurang ket kimmaru gapu iti panagdackel ti populasyon ken agtul-tuloy a lapped daytoy iti panangipaay ti dekalidad nga edukasyon.
Tapno masungbatan ti nasao a parikot, ilung-lungalong ti DepEd iti sidong ti panangidaulo ni Angara iti maysa a three-pronged strategy: panangipadek ti 105,000 a silid-pagadalan babaen ti public-private partnerships; panangpapartak iti implementasyon dagiti imprastruktura babaen ti nasapa a procurement; ken nairut a koordinasyon iti Department of Public Works and Highways (DPWH) para iti panangipasdek dagiti pagadalan a natibker iti kalamidad.
