BR LA UNION – Bimwelta ti Palasyo iti nagbalin a waragawag ni Vice President Sara Duterte mainaig iti dumacdackel nga utang ti Pilipinas.
Iti maysa a rally idiay Australia, kinuwestyon ni VP Sara ti nasurok a 16 a trilyon nga utang ti pagilian ket kinunana a saan a marikna ti publiko no sadino ti nakausaran ti maut-utang.
Segun kenni Palace Press Officer Claire Castro, saan laeng nga iti agdama nga administrasyon a nangrugi ti nasao nga utang.
Kinuna ni Castro nga idi Hunyo 2022, sakbay nga agtakem ni Presidente Ferdinand Marcos Jr. ket P12.79 trillion ti utang nga imbati ti Duterte administration.
Kinunana a dimmanon ti utang iti P6.83 trillion bayat ti panagtakem ni sigud a Presidente Rodrigo Duterte, kaibatugan ti 115.1% a panagngato nu ikumpara kadagiti immun-una pay nga administrasyon.
Segun iti Palasyo, ikagkagumaan ti gobierno a liklikan ti nalabes a panagutang babaen ti panangpapigsa iti ekonomiya ken umno a panagkolekta iti buis.
Nupay kasta, inadmitir ni Castro nga adda dagiti panawen a kas iti panawen ti krisis a saan a maliklikan a kasapulan ti gobierno ti kanayunan a pondo.
