BR LA UNION – Balligi iti insayangkat a drug buy bust operation iti nagtipon a puwersa dagiti otoridad, indaulwan ti San Juan Police Station, idi rabii ti Martes, Hulyo 1, 2025 idiay Barangay Panicsican, San Juan, La Union.
Binigbig ni PMAJ Reynante Organista, Chief of Police ti ili a San Juan, dagiti tallo a suspek: maysa a 40-anyos a misis; 57-anyos a lalaki, awanan trabaho ken 27-anyos a lalaki, surfing instructor ken agab-abang dagitoy iti maysa a dua a kadsaaran a balay idiay Barangay Panicsican.
Segun kenni Major Organista, adda pakabuklan a 12 a gramo ti mapapati a shabu iti maipagarop a nakumpiskar kadagiti suspek.
Kinuna ti hepe a maibilang a dackel a balligi iti pannakatiliw dagiti tallo a suspek agsipudta nalapdan ti posible a pannakaiwaras dagiti nasao nga illegal a droga.
Kinunana pay a ti pannaka-arestar dagiti suspek ket resulta ti follow-up operation iti immuna a pannakatiliw ti maysa a drug personality ditoy siyudad ti San Fernando kalpasan a maipagarop nga imbaga ti suspek a ti pagtataudan ti illegal a droga ket kadagiti suspek idiay ili ti San Juan.
Kalpasan iti operasyon naisayangkat ti inventory ken markings babaen iti panangimatang dagiti mangibagbagi manipud lokal a korte, media ken masekn an a barangay officials.
Nairekord ti operasyon babaen iti body worn cameras ken alternative recording device.
