BR LA UNION – Agpada a nagpasar ti pannakadadael iti maysa a pampasahero a barko ken bangka a pagkalap kalpasan a nagdinnungpar dagitoy iti kabaybayan partikular idiay Lucena port idiay Barangay Talao-Talao, Lucena City, Quezon ita nga aldaw ti Huwebes, Hulyo 3.
Iti maysa nga statement, inpadamag ti Philippine Coast Guard (PCG) a napasamak ti insidente itay alas-7:00 ti agsapa.
Agturong iti passenger vessel nga MV Peñafrancia VI idiay Balanacan Port, Marinduque manipud Lucena idinto nga agsubli metten ti fishing vessel (FV) Sr. Fernando 2 manipud Tayabas Bay idi nagdinnungpar dagitoy iti nasao a paset ti kabaybayan idiay Lucena.
Nagpasar ti barko ti pannakadadael iti starboard bow ken ramp bayat a nadadael met ti bow ti bangka.
Nupay kasta, natalged ken adda itan ti nasayaat a kasasaad ti amin a nakalugan ti MV Peñafrancia VI kabilang dagiti 18 crew ken 82 a pasahero kasta met dagiti 16 a crew a naglugan ti bangka.
Kalpasan ti insidente, nabilin iti MV Peñafrancia nga agsubli idiay Port of Talao-Talao idiay Lucena City para iti imbestigasyon ken inspeksiyon bayat a dagiti pasahero ket naiyakar iti MV Peñafrancia IX para iti medical checkup ken cargo assessment.
Kabayatanna, siniguro ti PCG nga awan ti pangta iti seaworthiness ti nasao nga insidente agsipudta awan ti nag-leak a langis wenno below-waterline damage a nailista.
