BR LA UNION – Mabalin a makatulong iti tarigagay nga interim release ni sigud a Presidente Rodrigo Duterte, iti findings ti Senate Committee on Foreign Relations nga idaulwan ni Sen. Imee Marcos a nag-imbestigar iti maipagarop nga iligal a panang-aresto ti sigud a presidente ken naiturong idiay The Hague, Netherlands.
Inlawlawag ti defense lead counsel ti sigud a presidente a ni Nicholas Kaufman, a kabaelan nga i-counter ti committee report iti argumento ti prosekusyon ti International Criminal Court (ICC) a mangipakita ti panagbalin a flight risk ti sigud a presidente gapu iti panang-kuwestyon na iti hurisdiksiyon ti ICC.
Maipalagip nga iti 10 a pinanid a dokumento a naisumite iti ICC Pre-Trial Chamber I idi napalabas a tawen, kiniddaw iti kampo ti sigud a presidente a palubosan da a mangidatag ti sungbat iti argumento ti prosekusyon kontra iti aplikasyon para iti interim release.
Ingkalintegan ti defense team a ti panagkedked ti sigud a presidente a sumuko iti maysa nga “unconstitutional” a panagaresto ken claim ti legal team na nga “extraordinary rendition” ket saan a rumbeng nga usaren kontra iti kadawatanna nga interim release agsipudta nakailanad iti report ti Senate Committee iti “domestic unlawfulness” iti pannaka-aresto ti sigud a presidente.
Mainaig ti daytoy, kiniddaw ti defense team a maisumite iti committee findings ken opisyal a mairaman iti rekord tapno mabalanse iti “factual gossip” nga imprisentar ti prosekusyon, a saan kunana a nagtaud iti naurnos nga imbestigasyon nudiket naggapo iti warnakan.
Maipalagip a maibasar iti findings ti Senate committee a naipablaak iti website ti Senado, nakailanad a mabalin a naka-aramid ti criminal ken administrative offenses dagiti opisyal ti gobyerno, seknan iti panangaresto iti sigud a presidente idi Marso 11 ken naiturong idiay The Hague, Netherlands.
