BR LA UNION – Naulaw iti aganay 100 nga estudyante ti Ilocos Norte National High School kalpasan a timmama iti magnitude 5.8 a gingined pasado las 11:00 ti bigat idi kalman, Hulyo 15.
Segun kenni Mr. Jerry Carreon, School Principal IV ti nasao a pagadalan, dagiti naulaw nga estudyante ket naiturong iti School Clinic, adda ti naiturong iti ospital, Office of the School Principal ken Student Activity Center.
Nupay kasta kunana, awan kadagitoy iti nasugatan malaksid ti pannakarikna da ti nerbiyos ken buteng.
Gapu iti ginggined, dagus a nagturong dagiti nagannak iti nadakamat a pagadalan tapno sukunen ken iyawid dagiti annakda.
Nagtitinnulong ti City Disaster Risk Reduction and Management Office ken ti Bureau of Fire Protection a nangiwanwan kadagiti estudyante.
Kabayatanna, kalpasan ti napigsa a gingined, indeklara ni Gov. Cecilia Araneta Marcos iti class suspension ti amin a level iti agpada a pampubliko ken pribado a pagadalan iti intero a probinsiya ti Ilocos Norte gaputi magnitude 5.8 a gingined.
Impaka-ammo met ni Mr. Marcell Tabije, mangidadaulo iti Provincial Disaster Risk Reduction and Management Office nga awan ti nailista a nasugatan wenno perdisyon gaputi gingined.
Gaputi kapigsa ti panagdayyeg, natinnag dagiti tagilako a produkto ken arwaten iti maysa a mall idiay ili ti San Nicolas idinto a dagiti empleyado ti Provincial Capitol ken City Hall ket dagus a rimwar gaputi buteng ken panagamak iti gingined.
