Pormalen nga impila ti National Police Commission (Napolcom) dagiti kaso nga administratibo kontra kadagiti 12 a pulis a karaman iti panakapukaw dagiti sabungero.
Dagitoy a kaso ket iti grave misconduct, irregular performance of duty, ken conduct unbecoming of a police officer.
Maipalagip a nangipila ti reklamo iti whistleblower a ni Julie “Dondon” Patidongan iti Napolcom, karaman iti kabagyan dagiti mapukpukaw a sabungero.
Maibasar iti imbutaktak ni Patidongan, dagiti pulis ket nabayadan tapno dukuten, patayen, ken ibilleng iti bangkay dagiti sabungero sadiay Taal Lake.
Mainaig iti daytoy ket adda dagiti rurog a nasarakan iti uneg ti lawa ken agdaman a maipaspasidong iti forensic examination tapno mapaneknekan no daytoy ket nagtaud kadagiti mapukpukaw a sabungero.
Nangipaay met ti lima nga aldaw a pawayway iti Napolcom para kadagiti pulis tapno agsubmitir ti counter-affidavit.
Maibagbaga pay nga adda dagiti alegasyon ti panangpadas nga impluwensyaan iti imbestigasyon, pakairamanan iti panagasideg dagiti sumagmamano a personalidad iti sabong industry iti opisyal ti Napolcom tapno makibiang iti kaso, ngem segun kenni Interior Secretary Jonvic Remulla, awan ti “sacred cow” iti imbestigasyon, uray mayor, gobernador, wenno senador ket mabalin a makaswan no adda ti naan-anay nga ebidensya.#
