Maiyalisen iti probinsya ti Sulu iti Region IX wenno Zamboanga Peninsula manipud iti Bangsamoro Autonomous Region in Muslim Mindanao (BARMM) babaen iti bileg ti Executive Order No. 91 a pinermaan ni Presidente Ferdinand “Bongbong” Marcos Jr. idi Hulyo 31, 2025.
Daytoy nga addang ket maitunos iti desisyon ti Korte Suprema a nangpatibker iti petisyon ti Sulu a saan rumbeng a mairaman daytoy ti BARMM, kalpasan a makontra iti ratipikasyon ti Bangsamoro Organic Law idi 2019.
Maibasar iti EO 91, panggep ti gobierno a masiguro iti agtultuloy a serbisyo-publiko idiay Sulu iti laksid ti panagbalbaliw ti regional jurisdiction.
Iti agdama ket manamnama a maaddaan ti phased transition babaen dagiti ahensya ti gobyerno ken lokal a gobierno tapno maliklikan iti panakaitantan dagiti proyekto ken programa.
Mapalubusan met iti institutional arrangements iti nagbaetan ti BARMM ken Sulu tapno maitultuloy dagiti agraraira a proyekto ken pondo a nakailatang para kadagiti probinsya.
Para kadagiti empleyado ti gobyerno idiay Sulu nga apektado ti reorganisasyon, adda ti nakasagana a retirement ken separation benefits, pakairamanan iti refund ti Pag-IBIG contributions ken commutation ti leave credits. Ngem saan da a mabalin a mare-employ iti executive branch iti uneg ti lima a tawen, malaksid no isuda ket mannursuro wenno agtrabtrabaho iti ospital.
Kabayatanna, nadutokan iti maysa a technical working group nga idaulwan ti Executive Secretary tapno iwanwan iti implementasyon ti EO 91 ken masigurado a naurnos iti panagalis ti Sulu iti baro a rehiyon.###
