BR LA UNION – Napaltugan iti gurong na iti maysa a Small Town Lottery Collector kalpasan a nagrikkiar da iti security guard ti maysa a mall idiay Barangay Pagdaraoan, San Fernando City, La Union.
Napasamak ti pammaltog idi Domingo, Agosto 3, 2025 agarop alas 9:10 ti bigat.
Iti suspek ket maysa a security guard, agtawen ti 60, addaan asawa, ken residente ti Brgy. Cabaroan, Tagudin Ilocos Sur.
Iti met biktima ket agtawen ti 18, estudyante, baro, STL collector wenno kabu ken residente ti Barangay Pagdaraoan ditoy siyudad.
Maibasar iti inisyal nga imbestigasyon dagiti otoridad, maipagarop a pinawilan ti guwardiya iti biktima nga agpataya ti STL iti bisinidad nangruna iti uneg ti mall.
Gaputi dayta, timpuar ti nabara a panag-sinnungbat dagiti dua agingga a napaltugan ti guwardiya ti nasao nga STL collector partikular iti maysa a gurong (leg) na.
Naiturong ti biktima iti pribado nga ospital idiay Barangay Carlatan para iti pannakataming.
Kabayatanna, iti suspek ket adda iti kustodiya ti San Fernando City Police Station ken manamnama a maidatagan ti maiyannatop a kaso.
