BR LA UNION – Kritikal ita iti kondisyon ti maysa 15-anyos nga estudyante kalpasan a pinaltugan ti sigud a boyfriend na, iti uneg ti pagadalan idiay
Nueva Ecija.
Segun kenni PMaj Williard Dulnuan, hepe ti Santa Rosa Nueva Ecija Police Station, napasamak ti insidente idiay Santa Rosa Integrated School agarop alas-10:45 ti agsapa idi Huwebes Agosto 7, 2025.
Iti suspek a maysa a 18-anyos a lalaki ket nakastrek iti pagad-adalan ti Grade 8 student, babaen iti pannaki-giddanna kadagiti dadduma nga estudyante a simrek iti nasao nga eskuwelaan.
Agpar-parang iti imbestigasyon a sigud nga agayan-ayat dagiti dua, ngem nagsina dagitoy, isunga ginagara ti suspek a katungtungen ti biktima iti uneg ti pagadalan.
Maipagarop a napaay iti suspek a makasarita ti biktima, isutgapuna a simrek ti suspek iti classroom ket pinaltugan na iti biktima, sakbay a pinaltuganna ti bukod na a bagi.
Mapapati a maysa a caliber 22 a paltog iti inusar ti suspek.
Agpada a naiturong dagitoy iti ospital ken agpada nga adda iti kritikal a kondisyon.
Gaputi insidente, temporaryo a nairikep ti pagadalan idi kalman.
Agtultuloy ti imbestigasyon dagiti otoridad iti napasamak a krimen.
