Ipa-blacklist ni Presidente Ferdinand Marcos Jr. iti SYMS Construction Trading a contractor ti flood control project idiay Barangay Piel, Baliwag, Bulacan ken makasango pay dagiti kaso a sagudayen ti Revised Penal Code ken RA 3019 wenno Anti-Graft and Corrupt Practices Act.
Daytoy ket kasaruno ti inaramid nga inspeksion ti Presidente iti maysa a concrete river wall project nga agbalor ti P55 million, ngem awan ti naipatakder a pader wenno naikkan ti uray maysa laeng nga hollow block.
Iti nasao a proyekto ket binayadan ti gobyerno ngem saan met a nakailista iti flood control projects ti Department of Public Works and Highways.
Impasigurado ni Presidente Marcos a saan na a palabasen dagiti anomalya, suspendiren ken kasuan ti panaglabsing ti Anti-Graft and Corrupt Practices Act, malversation of public funds, ken falsification of public documents dagiti opisyal a kakumplot dagiti contractors.###
