BR LA UNION – Sinerrek ti dua a lallaki a mangngibrong iti maysa a convenience store idiay Central West, Bauang, La Union idi Biyernes, Agosto 22, 2025 ken maipagarop nga intaray da ti P100-k a naglakwan ti sumagmamano nga aldaw.
Napasamak ti panagtakawan pasado alas 7:00 ti bigat ngem naireport ti insidente kadagiti otoridad agarop alas 11:57 ti aldaw.
Nabigbig iti biktima a ni Cristal Sistona Runiz, agtawen ti 44, awanan asawa, business owner ken residente ti Barangay Taberna, Bauang La Union.
Maibasar iti inisyal nga imbestigasyon ti Bauang Police Station, agarop alas 7:30 ti bigat a naglukat ti nasao a pagtagilakwan babaen iti maysa nga staff managan Angelou San Roman, 28 anyos, balasang ken residente ti Calumbaya Bauang La Union.
Iti oras ti alas 7:40 ti bigat, dua a lallaki ti simrek ken nagpammarang a customer iti nasao a convenience store.
Dagus a kinasao ni San Roman tapno damagen iti kasapulan da.
Makita iti CCTV footage, a gimmatang ti ice cream ti maysa a suspek, a nakabado ti nangisit ken gray a maong pants ken nangiyawat iti 1,000 pesos a kuwarta a bayad ti ice cream.
Makita pay iti CCTV footage, a nag-diretso a nagturong iti counter ti maysa a suspek a nakabado met ti striped a puraw ken nangisit ken naka-maong shorts, nga isuna ti nakita a nangala iti bag nga agmaris ti asul a maipagarop a naglaun ti 100,000 pesos.
Dagus a pimmanaw iti nasao a convenience store ti dua a suspek.
Maibasar pay ti report iti Bauang Police Station, naka motor iti dua a suspek ti click.
Iti agdama agtutuloy ti backtracking iti CCTV footage dagiti otoridad tapno mabigbig ti kinasiasino dagiti suspek.
