BR LA UNION – Imbabawi ti defense team ni sigud a President Rodrigo Duterte iti kadawatan da iti Appeals Chamber ti International Criminal Court (ICC) a madiskuwalipika ni Prosecutor Karim Khan manipud ti panangiggem iti kaso kontra iti sigud a presidente.
Segun iti lead counsel ni Duterte a ni Atty. Nicholas Kaufman iti dokumento a napetsaan ti Agosto 15, awan ti rason tapno pagdudua-an iti panagbalin a patas ni Khan wenno iti waragawag na nga awan ti conflict of interest seknan iti sigud a kliyente nga inakusaran a biktima ti war on drugs.
Kinuna ni Kaufman, a saan a kayat iti kampo ni Duterte a lapdan iti nasayaat a taray ti proseso, babaen iti agtultuloy a panang-kontra iti pannakipaset ni Khan.
Immunan nga imbaga ni Kaufman a nasken a maikkat ni Khan gaputa sigud nga abogado dagiti biktima ti war on drugs.
Ngem impaganetget ni Khan, nga awan ti conflict of interest ken saan a kasapolan a maikkat iti kaso.
Rinaem ni Kaufman iti prosecutor gaputi nasapa a panangipaay na ti impormasyon kalpasan a madutukan kas counsel ni sigud a Presidente Duterte.