BR LA UNION – Naisapublikon ti inisyal a miyembro iti binukel ni Presidente Ferdinand Marcos Jr. a fact-finding body a maawagan ti Independent Commission for Infrastructure (ICI) babaen ti Executive Order No. 94.
Iti ICI ket addaan ti mandato nga imbestigaran dagiti irregularidad, biddut a panagusar ti pondo, ken posible a korapsyon kadagiti proyekto ti gobyerno, partikular iti flood control, iti napalabas a 10 a tawen.
Addaan daytoy ti bileg a:
– Mangiruar ti subpoena
Agrekomenda ti kaso iti DOJ, Ombudsman, ken Civil Service Commission
– Ag-freeze ti assets ken mangiruar ti hold departure orders
Nadutukan kas commissioner da Rogelio “Babes” Singson, sigud a DPWH Secretary ken Rossana Fajardo, managing partner ti SGV & Co. ken maysa a saan pay a nainaganan a tumakder a chairman ti komisyon.
Bayat a ni Mayor Benjamin Magalong ti Baguio City kety agserbi nga special adviser iti komisyon.
Nabukel ti komisyon kalpasan a maibutaktak dagiti “ghost projects” iti flood control nga umabot iti P100 bilyon a kontrata.
Iti panagdengngeg idiay Senado ken Kamara, sumagmamano a contractor ken sigud nga opisyal ti DPWH iti nangibutaktak kadagiti kickback scheme a maipagarop a pakairam-ramanan ti sumagmamano a mammanday linteg.
Segun kenni President Marcos, iti ICI ket “truly independent” tapno masiguro ti integridad ti imbestigasyon.
Iti komisyon ket agsumite ti regular a report iti Office of the President ken agtalinaed agingga a malpas iti mandato daytoy wenno agingga a was-wasen ti Presidente.
