Inwaragawag ti Palasyo ti Malakanyang a ni Presidente Ferdinand Marcos Junior iti mangipadamag no sino iti agbalin a chairman ti nabukel nga Independent Commission for Infrastructure.
Segun ti Presidential Communications Office (PCO), posible a maigiddan daytoy iti oath taking dagiti miembro ti komisyon.
Dinakamat ti Malakanyang idi kalman da sigud a DPWH Sec. Rogelio Singson ken SGV Country Managing Partner Rossana Fajardo kas commissioners iti Independent Commission for Infrastructure, a nabilin nga agimbestiga kadagiti maanomalya nga infrastructure projects partikular dagiti flood control projects.
Nadutokan met kas special adviser ti ICI ni Baguio City Mayor Benjamin Magalong ken investigator ti komisyon.
Iti komisyon ket naipaayan ti kabaelan ken bileg a mangisyu dagiti subpoena, mangirekomenda ti panangipila dagiti kaso a kriminal wenno administratibo, makikoordinar kadagiti prosecutorial ken disciplinary body ken agkiddaw dagiti maiyannatup a dokumento kas dagiti libro, kontrata, rekord ti bangko, ken dadduma pay a materyales a kasapulan ti imbestigasyon.
Saan met a nangituding ti timeline iti palasyo iti aramiden nga imbestigasyon ti ICC ngem maisayangkat daytoy iti kabiitan a panawen.###
