Pinasingkedan ni House Deputy Speaker Representative Ronaldo Puno nga aglosolosen ni Speaker Martin Romualdez kas lider ti Kamara.
Segun kenni Puno, panggep daytoy nga addang a mapagtalinaed iti reputasyon ti Kamara, iti kangitingitan dagiti kontrobersya mainaig kadagiti flood control projects ken national budget.
Sumagmamano a damag iti mangibagbaga a maik-ikkaten dagiti gamit ni Romualdez manipud iti opisina, pakairamanan iti nameplate kas Speaker a mangpampamaneknek iti damag a panagbaba na iti puesto.
Segun kadagiti nakaimatang, maipagarop a nagbalin nga emosyonal ni Romualdez bayat ti panagpakadana kadagiti sumagmamano a kaalyado.
Iti agdama, agtartaripnong dagiti miembro ti majority bloc iti Office of the Speaker tapno talantanen iti sumaruno nga addang da sakbay iti pormal a panagikkat na. Manamnama a rumuar manipud iti panagtaripnong iti official statement ken iti agbalin a kasukat ni Romualdez.
Madakdakamat met ni Representative Faustino “Bojie” Dy III kas posible nga agbalin a House Speaker, ken sumagmamanon a manmanday-linteg iti nagpost maipanggep iti manamnama a panagbalbaliw iti liderato.
Segun kadagiti observers idiay Kamara, iti panagbalbaliw ket mabalin a mangitonda ti epekto iti balanse ti bileg ti Kamara, kangrunaan ta umasidegen iti deliberasyon iti sumaruno a national budget.###
