Inlawlawag ni Bise Presidente Sara Duterte nga insadya na a saan a makisinnarak kenni sigud a Bise Presidente ken agdama a Naga City Mayor Leni Robredo bayat ti kaaddaan idiay Naga City idi kallabes para iti Peñafrancia Festival.
Segun ti Bise, tarigagay na a protektaran ni Robredo manipud kadagiti pammabalaw a mabalin a maibato kenkuana kadagiti kaalyado daytoy, kas iti napasamak idi napalabas a tawen. Malaksid ditoy ket saan da met a nagpatang babaen ti telepono.
Maipalagip a dimmar-ay ni Duterte iti Marian procession idi Setyembre 14 kas paset ti Peñafrancia Festival, iti kadakkelan a Marian celebration iti pagilian.
Simmarungkar met isuna iti Porta Mariae Museum ken simmali iti tradisional a “Pagmamanto” tapno agkiddaw ti proteksion.
Idi napalabas a tawen, nagkita da Duterte ken Robredo idiay Naga City iti kapada a panagrambak.###
