Inakusaran ni Surigao del Sur Representative Johnny Pimentel ni dati a DepEd Undersecretary Epimaco Densing III a nagkiddaw iti kickback manipud kadagiti kongresista nga aggatad iti agingga iti 18% iti kontrata ti school building project.
Napasamak daytoy idi adda pay laeng ni Densing iti DepEd iti panangidaulo ni Bise Presidente Sara Duterte.
Nainget a pinaglibakan ni Densing ti alegasion ni Pimentel.
Kabayatan ti pannakadengngeg ti House committee on good government and public accountability, insalaysay ni Pimentel ti pannakisarita kenkuana ni Greg Morillo, a pinasingkedan ni Densing nga am-ammona.
Prangka a kinuna ni Pimentel a saanen rumbeng nga agsubli ni Densing iti opisina ta saan a kasapulan ti kasta nga aramid iti gobierno.
Kinuna ni Pimentel nga uray P170 million ti nailatang babaen ti National Expenditure Program ket naisardeng ti bidding process para iti maibangon a pasdek ti pagadalan gapu laeng ta saan nga immanamong iti kayat ni Densing.
Segun kenni Pimentel, inasitgan ni Densing ti sumagmamano a lehislador, a nangitukon iti alokasion para iti pannakaibangon ti school building a kasukat ti komision.
Innayonna nga adda kongresista iti Visayas a kiniddaw ni Densing iti 18% a komision.
Kinuna ni Pimentel a nakipagkita ni Densing kadagiti sumagmamano a kongresista iti Manila agraman ti maysa a kontraktor a ni Architect Ralph Tecson, a kunana a mangbangon kadagiti proyekto.
Sipapasnek nga inlibak ni Densing dagiti alegasion, nga inawagan dayta a direkta a kinaulbod, ken impasiguradona ti dedikasionna iti nalawag ken naproseso a wagas iti administrasion.
Nupay kasta, napartak a kinontra daitoy ni Pimentel. Iti tengnga ti nabara a panagsinnukat ti debate ket sinuspidir ti hearing.
Idi mapalubosan manen nga agsao ni Pimentel kunana nga itultuloyna ti mangurnong iti ebidensia maibusor ken ni Densing tapno mapaneknekan ti alegasionna.
Maysa kadagiti kadagsenan nga alegasion kontra ken ni Densing ti mapapati a panangmanipula na iti badyet ti DepEd para iti fiscal year 2024.
