Inlawlawag ti Department of Justice nga agdama a makidkiddaw iti Anti-Money Laundering Council iti pangipaulog daytoy ti ‘freeze order’ kontra kadagiti karaman iti listaan dagiti karaman ti maanomalya a flood control projects.
Karaman kadagiti manamnama a mapaulogan ket isuda Ako Bicol Party-list Representative Zaldy Co, Senador Joel Villanueva, Jinggoy Estrada, Chiz Escudero, sigud a Senador Bong Revilla, sigud a DPWH Undersecretary Roberto Bernardo, Engineer Brice Hernandez, ken dadduma pay.
Dagiti nasao nga opisyal ket paset kadagiti nairekomenda a makasuan ti reklamo a graft, malversation of public funds, ken indirect bribery ti National Bureau of Investigation.
Saan a karaman dagiti agasawa a Pacifico ken Sarah Discaya agsipudta addan iti immuna a reklamo ni Department of Public Works and Highways Secretary Vince Dizon kontra kenkuada.
Kabayatanna, inlawlawag ti sekretaryo iti kinapateg ti restitution para kadagiti agtarigagay a maipasidong ti ‘Witness Protection Program’. Saan pay a naikkat daytoy kagiddan ti nainget ken narigat a panangproseso iti ebaluasion kangrunaan kadagiti maikonkonsiderar nga ‘state witness’.
