BR LA UNION – Dinutukan ni President Ferdinand Marcos Jr. ni Department of Justice (DOJ) Secretary Jesus Crispin “Boying” Remulla, kas baro nga Ombudsman.
Ni Remulla ti mangpullat iti posisyon a binakante iti nagretiron a ni Hon. Samuel R. Martires idi Hulyo.
Iti sidong ti panangidaulo ni Sec. Remulla, inlungalong na iti Department of Justice dagiti kangrunaan a reporma tapno aramiden a moderno iti sistema ti hustisya, makissayan ti linnetlet iti pagbaludan, mapapartak ti panangresolba dagiti kaso, ken mapalawa ti access iti serbisyo legal.
Gaputi atiddog a serbisyona kas mammanday linteg, gobernador, ken abogado, nagun-od na iti respeto gaputi integridad ken dedikasyon iti panagserbi iti ili.
Kas baro nga Ombudsman, namnamaen ni President Marcos a pagtalinaeden ni Remulla iti transparency, papigsaen na dagiti addang kontra korapsyon, ken siguradwen a maipatungpal iti hustisya a patas ken napaspas.
Siguradwen nga awan ti sacred cows, awan ti eksepsyon, ken awan ti palusot gaputa iti public office ket maysa a public trust ket dagiti manglabsing daytoy ket rumbeng nga agsungbat.
Naminsan pay a siniguro ni Presidente Marcos a ti transparency, hustisya ken panangsurot ti linteg iti agtalinaed a giya ti administrasyon na iti panangbukel ti maysa a Bagong Pilipinas a pudno nga agserserbi a Pilipino.
Kabayatanna, inbinglay ti baro a dutok nga Ombudsman a ni Jesus Crispin ‘Boying’ Remulla a maibasar iti katulagan da kenni Presidente Ferdinand ‘Bongbong’ Marcos Jr. ni Deparment of Justice Usec. Fredderick Vida iti madutukan pay laeng nga officer-in-charge wenno acting secretary ti departamento.
