BR LA UNION – Inlawlawag ni Malacañang a saan a maikonsidera iti pannakawaswas ti Independent Commission for Infrastructure (ICI), iti laksid ti pannakadutok ti baro nga Ombudsman a mangimbestigar iti anomalya dagiti flood control projects.
Segun ken ni Undersecretary Claire Castro, saan laeng a dagiti anomalya iti flood control projects ti sakop ti Ombudsman, kinunana, nga adu dagiti kaso a kasapolan ti atensiyon.
Sungbat daytoy ni Castro iti saludsod no adda posibilidad a maitalek laengen iti Ombudsman ti imbestigasyon ken mawaswas ti Independent Commission for Infrastructure.
Kinuna ni Castro a saan a praktikal a maysa laeng nga ahensiya ti agtignay, nangruna nu adu dagiti kaso a nasken a mataming.
Kabayatanna, mainaig iti sumagmamano nga opinyon nga arigna doble a trabaho laeng iti ar-aramiden ti ICI, nangruna no dagiti kaso ket maiturong met laeng iti Ombudsman, imbaga ni Usec. ni Castro a napateg ti akem ti ICI tapno mapapartak ti proseso ti imbestigasyon.
Innayon ni Castro a makatulong ti kaadda ti independent body a kas iti ICI a mangurnong ken mangorganisar kadagiti dokumento sakbay a mairekomenda dagitoy para iti pormal a pannakaipila dagiti kaso.
Babaen iti nasao a wagas, naparpartak ti panagtignay ti DOJ ken Ombudsman kadagiti kaso nga addaan iti umdas a basaran.
