BR LA UNION – Aglad-ladingit ita ti pamilya, gagayyem, ken pada a content creator ti natay a ni Mae Urdelas, 23, manipud Barangay Malocloc Sur, Ivisan, Capiz kalpasan a naiyanod iti napegges a danum iti waig, iti kangitingitan ti panagduprak ti bagyo Ramil idi malem ti Sabado, Oktubre 18, 2025.
Nakita dagiti rescuers iti bangkay ni Urdelas kalpasan ti tallo nga oras, maysa a kilometro ti kaadayu manipud iti nakatinnagan na a creek.
Kabayatanna, idiay probinsiya ti Quezon, natay iti lima a miyembro ti pamilya kalpasan a natupakan ti palm tree iti kalapaw da, agarop alas 5:30 ti agsapa idi Domingo, Oktubre 19 idiay Barangay CawayaniN, Pitogo.
Karaman a natay iti ama nga agtawen ti 66, agassawa nga agpada nga agtawen ti 35 ken dua nga annak da nga agtawen ti 11 ken 5-bulan a maladaga.
Nakaipasidong iti Signal No.1 ti nasao a lugar idi napasamak ti insidente.
Maysa a 30-anyos a mangngalap iti mapukpukaw idiay probinsiya ti Eastern Samar kalpasan a napan nagkalap idi aldaw ti Sabado.
Segun iti National Disaster Risk Reduction and Management Council (NDRRMC) dagiti nailista a natay, nadunor ken mapukpukaw ket maipasidong iti balidasyon, isunga posible nga agbaliw pay ti nasao a bilang.
Iti sabali a bangir, kinuna ti state weather bureau, iti bagyo Ramil ket nanggubway ti torrential rains iti sumagmamano a lugar idiay Western Visayas, Eastern Visayas, Central ken Southern Luzon, ken Bicol region.
Maibasar iti datos, nangibuyat ti Tropical Storm Ramil iti nasurok 400 millimeters a tudo iti uneg ti 24 nga oras idiay Guiuan, Eastern Samar alas 8:00 A.M. idi Sabado, October 18 agingga alas 8:00 ti bigat idi October 19, kaibatugan ti maysa ket kagudwa a tudo para iti bulan ti Oktubre.
