Dumanon ti pakabuklan nga 1,185,460 iti bilang dagiti indibidual a naamuan ti Department of Social Welfare and Development (DSWD) nga apektado iti panagduprak ti bagyong Tino. Katukad daytoy ti 322,488 a pamilya manipud kadagiti 3,426 barangay.
Manipud ti nasao a bilang, nasurok 109,000 a pamilya iti temporario nga agnanaed kadagiti nasurok 4,000 nga evacuation centers.
Dagiti dadduma ket pinili da a makinaed kadagiti kabagian ken am-ammo, wenno nagtalinaed iti ruar dagiti evacuation centers.
Segun ti DSWD Disaster Response Management, dakkel a porsiento dagiti apektado a pamilya ket manipud kadagiti probinsia idiay Visayas bayat nga apektado iti Luzon ken Mindanao kas dagiti residente idiay Mimaropa, Calabarzon, Caraga, Zamboanga Peninsula, ken Northern Mindanao.
Ti agdama, agtultuloy a maipaspasidong ti assessment ken validation dagiti nadadael a babbalay ngem adda ti siyam a totally damaged bayat a 33 dagiti partially damaged.
Nakaipatulod metten iti ahensia ti nasurok P66 million a gatad ti tulong kadagiti biktima.###
