BR LA UNION – Adda ditoy iti sumagmamano a nalatak nga storm chasers manipud Estados Unidos ken Europa tapno personal a bantayan ti Bagyo Uwan.
Para kadakuada, nupay maayatan da a mangkitkita, maysa daytoy a dakkel a sistema nga agpang-pangta iti Northern Luzon.
Segun kenni Josh Morgerman, simmangpet ditoy Pilipinas idi rabii ti Biyernes ken nagturong idiay Aurora Province tapno sadiay a bantayan ti garaw ti bagyo.
Inladawan na iti Bagyo Uwan kas maysa a “dakkel ken nakabutbuteng a sistema” a nabukel iti Pacific Ocean ken agtutuloy nga umas-asideg iti Luzon.
Impaganetget ni Morgerman, a pagaammo gapu iti nalawa a kapadasanna iti panangmonitor kadagiti dadakkel a bagyo iti intero a lubong, a nupay nabannog pay laeng iti naudi a misyonna idiay Jamaica, saanna a palabsen ti gundaway a mang-assess iti super typhoon ditoy Pilipinas.
Dagiti storm chasers ket pakairaman iti team ni James Reynolds nga agturong idiay Quirino, team ni Josh Morgerman nga agturong idiay Aurora, bayat nga adda dagiti dadduma idiay Bicol tapno i-monitor ti epekto ti “monster typhoon” idiay Catanduanes.
Dagiti storm chasers ket nalatak nga eksperto iti panang-tutok kadagiti bagyo, a masansan nga ar-aramiden da ket sumrek da iti mata ti bagyo tapno makaala ti mas detalyado a datos.
Nupay kasta, pinalagipan iti publiko a saan a padasen iti nasao nga aramid, agsipudta kasapolan daytoy ti nangato a lebel ti kapadasan ken umdas nga arwaten tapno maliklikan ti peligro iti biag dagiti observers.
