BR LA UNION – Nabayagen nga ikag-kagumaaan ni President Ferdinand Marcos Jr. a maurnos ken masolusyunan dagiti problema nga inbati ti napalabas nga administrasyon.
Sungbat daytoy ni Palace Press Officer USec. Claire Castro iti panawagan ti United People’s Initiative nga agpanpanawagan kenni Presidente Marcos nga agaramid kadagiti addang tapno maisubli ti panagtalek ti publiko kalpasan ti kontrobersiya maipapan kadagiti flood control projects.
Kinuna ni Castro a saan a liplipatan ti publiko nga inrugi ni Presidente Marcos ti nauneg nga imbestigasyon tapno maipakita kadagiti umili a kadwa da daytoy iti laban kontra korapsyon.
Impaganetget ni Usec. Castro a dagiti kayatda nga ikkaten ti Presidente iti puwesto ket dagiti indibidual ken grupo a mabalin a naapektaran wenno maapektaran kadagitoy nga imbestigasyon.
Iti agdama, in-inuten a rumrummuar dagiti ebidensiya, isunga saan nga ipalubos a sumipnget manen ti kasasaad babaen kadagiti grupo a mangikagkagumaan a manglapped iti panagsungbat kadagiti naka-aramid ti maikaniwas.
Impaganetget pay ni Castro, a nu agbaliw ti liderato, posible a saanen a maituloy dagiti imbestigasyon ken maikkan iti gundaway a makalibas dagiti korap ken kusit nga opisyal ti gobyerno.
