Pinasingkedan ni Presidential Anti-Organized Crime Commission (PAOCC) Spokesperson Winston Casio nga agdaman a kidkiddawen ti gobierno iti International Criminal Police Organization (Interpol) a mangipaulog ti maysa a red notice kontra kenni sigud a Presidential Spokesperson Atty. Harry Roque.
Segun kenni Casio, narigat iti agbalin a proseso gapo kadagiti ipakpakita ken iwarwaras ni Roque nga isu ket maipagarup a biktima ti maysa a political prosecution.
Nupay kasta ket impaganetget na nga awan ti basaran dagiti waragawag ni Roque ken dagiti amin a proseso ket nakabasar kadagiti pisikal nga ebidensia maikontra kenkuana.
Idi bulan ti Mayo, nangipaulog dagiti otoridad ti warrant of arrest kontra kenni Roque, Lucky South 99 Representative Cassandra Li Ong, ken 48 a sabsabali pay para iti qualified trafficking ken illegal nga operasion ti Philippine Offshore Gaming Operations (POGO).
Kenuna ti PAOCC a nakaurnongda ti ebidensia a mangpaneknek a pudno a naaddaan ti human trafficking iti uneg ti Lucky South 99 kas iti torture, panagdukot, ken sex trafficking.
Naisalakan met ti saan a bumaba ti 158 nga empleyado.
Kabayatanna, immunan nga inlebak ni Roque dagiti alegasion ken tinakderan nga awan ti pakainaiganna kadagiti operasion ti Lucky South 99.#
