BR LA UNION – Ibilang ti kampo ni Cassandra Ong a pang-pagulo ti indiaya ti Department of Justice (DOJ) a maysa a milyon a pisos (P1M) a gunguna para iti siasinuman a makaipaay ti impormasyon seknan iti lokasyon ni Ong.
Iti maysa a waragawag, imbaga ti legal counsel ni Ong a ni Atty. Ferdinand Topacio a ti panangilatang ti gunguna ket paset laeng ti serye dagiti addang ti agdama nga administrasyon tapno ibaw-ing ti atensyon manipud iti nabara nga isyu ti flood control scandal.
Kinuna na, ti nasao nga iskandalo ket pangta a makadadael iti Palasyo, isunga agsasaruno dagiti ar-armiden nga addang tapno maala ti atensyon ti publiko.
Binabalaw pay ti abogado iti administrasyon, gaputa tunggal mairaman ti nagan ti presidente ken kakabagyan na kadagiti sensitibo nga isyu, biagen met ti gobyerno ti sumagmamano nga isyu tapno kalluban daytoy.
Maipalagip a nakanselar ti pasaporte ni Ong gapu iti sangsangwen na a kaso a qualified human trafficking, kalpasan a nairaman iti operasyon ti maysa a Philippine Offshore Gaming Operators (POGO) site idiay Pampanga.
Maibasar iti report ti Presidential Anti-Organized Crime Commission, idi Oktubre 13 pay a nangiruar ti red notice iti International Criminal Police Organization (Interpol) kontra kenni Ong, kasaruno ti immuna a request ti gobyerno ti Pilipinas.
