Imbasura ti International Criminal Court (ICC) Appeals Chamber babaen ti ‘unanimous’ decision iti kiddaw nga interim release wenno temporario a pannakairuar ni sigud a Presidente Rodrigo Duterte idi kalman, Biernes, Nobiembre 28.
Binasa ni ICC Appeals Chamber Presiding Judge Luz del Carmen Ibáñez Carranza iti nadakamat a desision a saan a mapagbigyan dagiti tallo a nagbalin a basaran iti apela ti kampo ti sigud a presidente.
Iti apela ti depensa, inkalinteganda a nagbiddut iti Pre-trial Chamber I a nangukom nga addaan ti flight risk wenno mangigubuay ti pegged ni Duterte kadagiti testigo, panagkedked iti state guarantee, ken iti saan a panangited-importansia iti humanitarian consideration.
Nupay kasta, idi kalman, pinasingkedan ti Appeals Chamber iti nagbalin a desision ti Pre-trial Chamber I nga immunan a pinagkedkedan iti apela ti sigud a Presidente para iti interim release, kalpasan nga inkeddengda iti pagkasapulan nga agtalinaed a nakadetine iti sigud a Presidente.
Sakbay iti panakaibasa ti desision, immuna a nag-waive ni Duterte ti karbenganna nga agbalin a present iti pannakaibasa ti resulta ti interim release request ken binilin dagiti abogadona a mangibagi kenkuana.
Iti agdama, agtaltalinaed a nakadetine ni sigud a Presidente Duterte iti ICC Detention Facility idiay TheHague, Netherlands.#
