Dismayado dagiti tagasuporta ni sigud a Presidente Rodrigo Duterte iti desision ti International Criminal Court (ICC) Appeals Chamber nga ibasura iti kiddaw para iti interim release.
Segun kenni Atty. Manuelito Luna iti panakiuman ti Bombo Radyo, namnamaenda a mapaboran iti apela gapu iti kasasaad ti sigud a presidente, partikular iti saritaan maipapan ti salun-at.
Nagpanawagan ni Luna kadagiti tagasuporta nga agtalinaed a kalmado ken liklikan iti nadarasudos nga aksion, nupay saan da a malapdan iti mangipeksa ti karirikna ken pannakasuron.
Pinabasol pay ni Luna iti Marcos administration gapu iti panangipatulodna kenni Duterte idiay The Hague tapno maidetine, imbes a maidarum ditoy Pilipinas no adda ti basaran.
Kabayatanna, iti dasig dagiti kabagian dagiti biktima ti war on drugs, impeksa ni Atty. Gilbert Andres, maysa nga ICC-accredited lawyer, iti kinaragsakda iti desision.
Kenunana, namnamaen dan iti resulta ngem ad-adda a naragsakan iti mismo a panakaibasa ti desision, gapu ta makitkita da daytoy kas rugi ti balligi para iti karbengan-pangtao a naiyimot kadagiti biktima.#
