BR LA UNION – Naibalud ti dua a mekaniko kalpasan a natiliw da iti insayangkat a buy bust operation dagiti otoridad idiay Barangay Nagrebcan, Bauang, La Union idi Nobyembre 27, 2025.
Dagiti suspek nga agpada nga adda iti umno nga edad ket maibilang nga street level individuals a maipagarop a karaman iti illegal drug trade, ken residente ti Barangay Pico, La Trinidad, Benguet ken Barangay Dili, Bauang, La Union.
Natiliw dagiti suspek iti inwayat nga operasyon ti nagtipon a puwersa ti Bauang Police Station, LUPDEU, LUPIU RIU I, 1st PMFC, ken TSC-RMFB1 kalpasan a nagilako dagitoy ti maipagarop a shabu iti police officer a nagpammarang a poseur buyer.
Nakakumpiskar dagiti otoridad manipud kadagiti suspek ti: aganay dua gramo ti suspected shabu, mapatta-patta nga agbalor ti P13,600 ken sumagmamano a non-drug items.
Sumangsango ita dagiti suspek ti kaso nga adda pakainaigan na iti panaglabsing ti RA 9165.
