Posible a mangipila ti motion for reconsideration iti kampo ti negosiante a ni Atong Ang para iti dua a kaso ti kidnapping a nakatuding nga ipila kontra kenkuana ti Department of Justice (DOJ) a mainaig iti kontrobersial a kaso dagiti mapukpukaw a mammallot.
Segun kenni Atty. Gabriel Villareal, posible a kiddawen da iti DOJ a baliktaden iti desision a panangipila ti kaso a kidnapping with homicide ken kidnapping with serious illegal detention maibusor.
Immunan a binabalaw ti abogado iti resolusion ti Justice Department kontra kenni Ang kas maysa a makadadael la unay ken saan a patas iti akusado.
Nalawag kunana nga agdepdependir laeng iti panel iti depekto a testimonya ti kakaisuna a saksi nga addaan ti namulitan nga integridad.
Maipalagip a ninaganan ni Julie Patidongan ni Ang ken dagiti dadduma pay nga indibidual karaman dagiti sumagmamano a polis, a maipagarup a karaman iti panagpukaw ken pannakapapatay dagiti nasurok 100 a mammallot a naakusaran ti game-fixing iti online sabong.
Kamaudiananna, kenuna ni Atty. Villareal nga agtalekda a maibasura dagiti amin a “malicious” ken parparbo nga alegasion ni Patidongan iti umno a panawen.#
