Imbatad ti abogado ni Senador Ronald “Bato” Dela Rosa a ni Atty. Israelito Torreon a saandan nga agsarsarita ti Senador sipud pay idi Nobiembre 7, ken ti laeng asawana a ni Nancy iti makonkontak na para iti legal a saritaan.
Segun kenni Torreon, saan a mainaig iti ICC iti maudi a panagsaritada ken nagsardengen a summungbat ni Dela Rosa.
Kenunana, adda ti “pannakariro” iti gobierno gapu ta nagduduma iti waragawag ti Department of Foreign Affairs (DFA), Department of Justice (DOJ), Department of the Interior and Local Government (DILG), ken Office of the Ombudsman maipanggep iti maipagarup nga ICC warrant.
Awan iti linteg ti Pilipinas a mangikeddeng no kasano nga ipatungpal iti ICC warrant, maisupadi kadagiti pagilian kas ti Germany, Austria ken Canada. Saan metten a paset iti pagilian iti ICC isu nga awan iti obligasion nga isuko iti senador.
Innayon na pay, adda ti panagamak ni Dela Rosa nga i-turn over isuna kadagiti international authorities a saan a dimmalan iti lokal a korte kas iti napasamak kenni sigud a Presidente Rodrigo Duterte.
Idi napagsaludsodan no isu iti nangbalakad iti Senador nga liklikan dagiti Senate sessions, nagkedked ni Torreon a sumungbat, ngem pinasingkedanna a bukod a desision daytoy ni Dela Rosa.
Nagpanawagan isuna nga iruar ti gobierno iti opisial a kopya ti maipagarup nga ICC warrant, ken nagkiddaw nga ipaayan isuna tapno maiparang iti Korte Suprema.#
