BR LA UNION – Inbutaktak ni Department of the Interior and Local Government (DILG) Secretary Jonvic Remulla a maipagarop nga aglem-lemmeng ni sigud a Bureau of Corrections (BuCor) Director General Gerald Bantag iti kabakiran idiay Cordillera Administrative Region.
Ti sigud a heneral iti matudtudo a mastermind iti pammapatay iti beterano a broadcaster a ni Percy Lapid, sumagmamano a tawenen ti napalabas.
Iti maysa nga interview, imbaga ni Remulla a ni Bantag ket prot-protektaran dagiti lokal a tribo iti lugar a paglem-lemmengan na.
Maipagarop a saan nga agus-usar ti cellphone ti sigud nga opisyal ken paakar-akar met ti pagdagusan iti nasao a rehiyon ken saan nga agar-aramat ti lugan.
Iti agdama, adda nakapatong a P2 million a reward money para iti pannaka-aresto ni Bantag.
Daytoy ket immuna pay laeng nga indiaya ti Department of Justice (DOJ) ken National Bureau of Investigation (NBI) idi Hunyo 2023 wenno sipud nasuspendi kas BuCor chief.
Kadwa ni Bantag a naakusaran iti nasao a krimen ti sigud a deputy na a ni Ricardo Zulueta, a napatongan met idi ti ulo na ti P1 million ngem pimmusayen daytoy gaputi sakit.
