Pinatalgedan ni sigud a Senador Antonio Trillanes IV nga adda paylaeng idiay Davao City ni Senador Roland “Bato” Dela Rosa, maysa a bulanen manipud iti saan na a panagparang iti sesyon ti Senado.
Daitoy ket laksid ti immun-unan a kumpirmasyon ni Ombudsman Jesus Crispin Remulla nga adda sadiay Central Luzon ti senador, partikular idiay Pampanga.
Ti pannakiuman ti Bombo Radyo ket impaganetget ni Trillanes nga aglemlemmeng latta ni Dela Rosa idiay Davao, a kas ti inar-aramid na kadagiti naglabas a lawas.
Segun kenkuana, sumagmamano a lawasen manipud idi kinunana nga adda sadiay balwarte dagiti Duterte ti sigud a Philippine National Police chief ken awan ti indikasyon a kayat na a panawan iti lugar.
Agtalek ni Trillanes a saan nga ilemlemmeng dagiti miembro ti unipormado a hanay kas iti militar wenno pulisya ti sigud a heneral, nu di ket isuna laeng ken dagiti nasinged kenkuana ti makaammo iti posible a lokasyon na.
Saan met a pinasingkedan wenno iliblibak ni Trillanes nu adda iti ammo na iti mapapati a kopya ti warrant of arrest kontra kenni Dela Rosa.
Ti agtultuloy a panaglemmeng ti senador ket mabalin a mausar kas ethics complaint a plano a maidatag kontra kenkuana inton madanon iti panawen, kasaruno iti saan na a panagparang ti trabaho.
Inyarig ni Trillanes ti kaawan kumpirmasyon manipud iti gobierno ti Pilipinas nu adda nga agpayso iti warrant, ngem laksid daitoy ket pinili ni Dela Rosa iti aglemmeng. Daitoy nga araramiden na ket mabalin a masingir gapo iti saan na a panagserrek nga awan met iti nainkalintegan a rason.
