BR LA UNION – Inyanunsiyo ni US President Donald Trump ti plano a konstruksiyon ti Navy battleships a maipanagan kenkuana iti sidong ti “Golden Fleet” plan.
Inaramid ti US President iti anunsiyo manipud Mar-a-Lago residence na idiay estado ti Florida.
Segun kenni Trump, ti baro a Trump-class ships ti agbalin a kadakkelan a barko panggubat iti pakasaritaan ti Amerika ken kadakkelan a battleship a maipatakder iti pakasaritaan ti intero a lubong.
Kinuna na, a namnamaen a marugyan iti kabiitan a panawen ti konstruksiyon iti Trump Class USS Defiant ships, nga equip ti heavy weapons kas ti nuclear-armed cruise missiles, napaspaspas ken mamin-sangagasut a daras a napigpigsa.
Kinuna na, inisyal a marugyan ti konstruksiyon ti dua a baro a battleship, ngem plano na a mapaadu agingga ti 25.
Segun iti US President, agbalin nga operational dagiti barko a panggubat iti uneg ti dua ken kagudwa a tawen.
Paset ti nasao a plano a mapalawa pay ti US Navy iti manned and unmanned vessels dagitoy kabilang dagiti dadakkel a barko panggubat nga armado ti missile ken babassit a barko.
