BR LA UNION – Inallokoy ni Presidente Ferdinand R. Marcos Jr. dagiti Pilipino nga aywanan ti salun-at ken kinatalged tapno agbalin a naragsak ken nakapya ti panangrambak ti Paskua.
Iti BBM VLOG-na, kinablaawan ti Presidente dagiti umili a Pilipino ken inyebkasna ti tarigagayna nga agbalin a naragsak ken natalna iti selebrasyo ti Paskua a kadwa ti pamilya ken ay-ayaten ti biag.
Nagpalagip ni President Marcos nga aginnayad ti pannangan nangruna kadagiti pasken ken Christmas party.
Segun iti Presidente, ngumato ti kaso ti atake iti puso tunggal paskua gaputi nakaru a pannangan iti nataba.
Malaksid dayta, binalakadan ti Presidente dagiti motorista nga agannad iti panagmaneho ita a panawen ti bakasyon ken panagbiyahe.
Para iti panangsarabo ti Baro a Tawen, inallokoy ni Presidente Marcos iti publiko a liklikan ti agusar iti paputok ken agaramat laengen ti torotot ken dadduma pay a natalged nga ay-ayam.
Iti udi, impalagip ti Presidente iti amin, a ti salun-at ken kinatalged ti tulbek iti maysa a pudno a naragsak ken napnuan kaipapanan a panangrambak ti paskua ken baro a tawen.
