BR LA UNION – Dua nga uram ti napasamak idiay siyudad ti Butuan idi aldaw ti paskua, Disyembre 25.
Ti umuna nga insidente, timpuar ti uram alas-11 ti bigat a nakauraman ti lima a babbalay idiay Purok 5, Brgy Baan Riverside ken naka-apektaran ti 12 a pamilya wenno 49 nga indibidwal.
Segun kenni Acting City Fire Marshal, Fire Senior Inspector Ronald Vasquez, a maibasar iti inisyal nga imbestigasyon, nangrugi ti apoy iti balay ni Rolly Sanchez agingga a nagramaram ken nakairamanan ti babbalay dagiti cabagyan na.
Ti maikadwa nga insidente ket napasamak iti oras alas-7:45 ti rabii ket umabot iti nasurok 20 a babbalay ti dimmapo idiay 3-A, Barangay Holy Redeemer a nangigubway ti dakkel a perdisyon iti sanikua ken nakaru a panagliday dagiti 33 nga apektado a pamilya wenno 120 nga indibidwal nangruna ket napasamak daytoy iti mismo nga aldaw ti paskua.
Napasamak ti insidente iti batog ti fish landing area, ken dagus a rinespondian dagiti kameng ti City Disaster Risk Reduction and Management Department wenno CDRRMD ALIMAT ken Butuan City Central Fire Station.
Agtultuloy ti panangtakwat ti Butuan City Central Fire Station iti makagapo ken danyos ti dua nga insidente ti uram.
