BR LA UNION – Impangato ti PHIVOLCS iti Alert Level 2 manipud Alert Level 1 iti estado ti Mayon Volcano kalpasan a nailista ti agtultuloy a panagngato ti rockfall manipud iti summit lava dome.
Sipud idi Nobyembre 2025, umaboten iti 599 rockfall events ti nailista wenno average a 10 kada aldaw, ngem ngimmato iti 21 kada aldaw iti naudi a lawas ti Disyembre.
Idi Disyembre 31, 2025, nakailista ti 47 rockfall events, kangatuan iti uneg ti makatawen.
Segun iti PHIVOLCS, ti panagadu ti rockfall ket indikasyon ti panagdakkel ti magmatic dome a mabalin nga agbanag iti panagbettak, kas ti napasamak sakbay iti 2023 eruption.
Malaksid dayta, rimwar nga adda abnormalidad iti ground deformation ti bulkan iti napalabas a 18 bulan, a mangipakpakita ti agtultuloy a swelling iti bakrang ti bulkan.
